Di Santo Trovato
'N tutta la storia di la razza umana nudda terra e nuddu pòpulu havi suffrutu 'n modu n'àutru tantu tirrìbbili pi la schiavitù, li cunquisti e l'upprissioni stranera, e nuddu hà luttatu 'n modu tantu ndumàbbili pi la sò nnipinnenza comu a la Sicilia e a li siciliani. Quasi dî tèmpura di quannu Polifemu passijava ammeri a l'Etna, o quannu Cèreri nzignava a li sìculi la cultivazzioni dû frummentu, nzinu a li jorna nostri, la Sicilia hà statu lu tiatru di mmasioni e guerri cuntìnui, e di ntrèpita risistenza. Li siciliani sunnu n'ammiscata di quasi tutti li razzi dû sud e dû nord; prima di li sicani abburìggini cu li finici, appoi cu li cartaginisi, li grechi e li schiavi d'ogni parti dû munnu, mpurtati nti l'ìsula pô mutivu di tràffichi o di guerri; e appoi di àrabbi, nurmanni e taliani. Li siciliani, ntô mentri di tutti sti trasfurmazzioni e mudificazzioni, luttaru e cuntìnuanu a luttari, pi la sò libbirtà.
Chiossai di trenta sèculi arredi di oggi, l'abburìggini di la Sicilia fìciru risistenza comu meghiu putìanu a lu pridumìniu di l'armamenti e a l'arti militari di li mmasuri cartagginisi e grechi. Vìnniru fatti tribbutari, ma non foru mai suttamisi cumpritamenti di chisti o di chiddi. Pi nu longu tempu la Sicilia fu lu campu di battagghia dî grechi e dî cartagginisi; la sô genti vinni arudduciuta 'n ruina e na parti fatta schiava; li soi cità, abbitati di cartagginisi e grechi, foru li centri di unni l'upprissioni e la schiavitù si spanneru dintra a l'ìsula. Sti primi siciliani, pirò, non si scantaru mai di luttari pi la libbirtati, o quantumenu di vinnicàrisi quantu chiossai putìanu di li patruni cartagginisi e di Sarausa. Li rumani suttamìsiru cartagginisi e sarausani e nni vinnèru comu schiavi quantu cchiù nni pòttiru. Foru accuddì vinnuti tutti nti na vota 30.000 abbitanti di Panormu, la muderna Palermu. Li rumani fìciru travagghiari la terra siciliana d'assai squatri di schiavi, pô mutivu di dàricci a manciari cu lu frummentu sicilianu a li prulitari pòviri di la Cità Eterna . Pi fari chissu, non sulu fìciru schiavi l'abbitanti di l'ìsula, ma purtaru àutri schiavi di tutti li banni.
Ma sutta a Dionigi di Sarausa e sutta a li rumani, 'n Sicilia ci foru li cchiù tirrìbbili nzurrizzioni di schiavi, unni la pupulazzioni ndìggina e schiavi mpurtati facìanu ô spissu causa cumuni. Duranti la dissuluzzioni di lu mpèriu rumanu, la Sicilia vinni assartata di tanti mmasuri. Appoi li mori si nni mpatrunìru pi nu pirìudu; ma li siciliani, suprattuttu li pupulazzioni urigginàrii dû nternu, arisisteru sempri, cu cchiù assai o cchiù picca successu, e tanticchia â vota tìnniru o cunquistaru tanti nichi privileggi. Quannu li primi luci avìanu accuminciatu a spannìrisi picca picca ntô scuru di lu mediuevu, li siciliani avìanu già cunquistatu cu l'armi non sulu tanti libbirtà municipali, ma macari li primi funnamenti di nu cuvernu custituzziunali, accussì comu tannu non c'era a nudda àutra banna. Prima d'ogni àutra nazziuni eurupea, li siciliani cô votu dicìsiru lu rèdditu di li sò cuverni e di li sò suvrani. Accussì lu solu sicilianu s'hà sempri dimustratu murtali pi l'upprissuri e li mmasuri, e li Vèspiri siciliani ristaru mmurtalati nni la storia…”
(Marx-Engels, Opere complete, Editori Riuniti, vol. XVII, pagg. 375-377).
Nessun commento:
Posta un commento