Rivuluzzioni ndipinnintista siciliana dû 1848

Contributo di Santo Trovato

La rivuluzzioni ndipinnintista dû 1848 succidìu 'n Sicilia e rapprisenta la prima nna l’Europa di ddu annu chi nfatti era riccu di rivuluzzioni ndipinnintisti e/o libbirali. Duranti lu piriudu d'un menzu sèculu dû 1812 ô 1862 nni attruvamu armenu quattru rivuluzzioni significanti chi abbènninu 'n Sicilia. Chidda dû 1848 è ricurdata nun sulu pû fattu ca succidìu nta n'èbbica europea quannu s'attròvanu assai rivuluzzioni pi tutti banni, ma puru pû fattu dâ mudirnità dî principî affirmati, cuntinennu chiddi dâ rapprisintatività pupulana e dâ cintralità dû Parramentu, tantu menu dâ supiriurità dû Parramentu a rispettu ô stissu Re. Ô stissu tempu fu pruposta l'idia assai avanzata di na cunfidirazzioni cu l’àutri stati e pòpuli di l'Italia. Li principî suciali e pulìtici chi vìnniru affirmati si ponnu vidiri comu na cuntinuità dì cunquisti dâ pricidenti Custituzzioni siciliana dû 1812, chi rapprisintau nu mudellu assai avanzatu videmma ('n tèrmini jurìdici e pulìtici).



Lu risurtatu di sta rivuluzzioni fu n’abbrivisciutu Statu Sicilianu, supravivennu p'un annu (o siìdici misi, p'èssiri cchiù pricisi). Lu statu fu guidatu di Ruggeru Sèttimu, chi, numinatu Patri dâ Pàtria e Prisidenti dû Cunzigghiu dû Regnu di Sicilia, si cumpurtau daveru e propiu comu Capu di Statu ‘n aspittanza ca lu Parramentu Sicilianu addijissi un cannidatu ô tronu, capaci di libbiràrisi d’ogni liami câ dinastìa d’appartinenza. Quarchidunu supratuttu pripiratu a accittari in toto la Custituzzioni Siciliana.

Câ cunzinna di Palermu, lu 15 di maiu dû 1849, lu Statu Sicilianu, natu dâ rivuluzzioni dû 12 di jinnaru, accabbau di vìviri e li Burbuna riturnaru ô putiri.

Ruggeru Sèttimu si nni jiu ’n esiliu ntâ Malta, a bordu di na navi ngrisa. Ntô portu di Valletta fu accittatu cu l’anuri d’un Capu di Statu. Murìu ntâ Malta ntô 1863. La salma di Sèttimu è oi sippilluta nnâ Chiesa di San Domenico, Pantheon dî Siciliani